Plantun de Prouvènço

Pèr coumpara dos planto d'encò nostre

Medicago littoralis & Scleranthus annuus

Medicago littoralis

Fabaceae Leguminosae

Noms en français : Luzerne du littoral, Luzerne des grèves.

Descripcioun :
Aquelo luserno que s'estiro au sòu èi di proun pelouso. Se destrìo dis autro qu'a si fru sènso péu e que viron sus mai de tres tour (fotò). Sus li barrihet i'a de pouncho un pau longo mai que soun pas croucudo au contro de Medicago minima. Vèn bèn sus li coustiero mai rintro de cop que i'a dins li terro safranouso e li roucaio.

Usanço :
Couneissèn pas d'usanço particuliero pèr aquéu Medicago. Ei poussible que siegue proche de Medicago sativa. Fau saupre que li grano d'aquéu d'aqui soun empouisounanto que caupon de canavarine.

Port : Erbo
Taio : Pancaro entresigna
Fueio : coumpausado
Tipe bioulougico : Teroufite
Cicle bioulougico : Planto de l'an

Gènre : Medicago
Famiho : Fabaceae
Famiho classico : Leguminosae

Coulour de la flour : Jauno
Petalo : irreguliero
Ø (o loungour) flour : Pancaro entresigna
Flourido : Printems

Sòu : Ca
Autour basso e auto : Pancaro entresigna
Aparado : Noun
Remarco : Planto de coustiero

Liò : Mar - Sablo
Estànci : Termoumediterran à Mesoumediterran
Couroulougi : Pancaro entresigna
Ref. sc. : Medicago littoralis Rohde ex Loisel., 1810

Gnavello(-de-l'an)

Scleranthus annuus

Caryophyllaceae

Nom en français : Gnavelle annuelle.

Descripcioun :
Aquelo planto, proun ramificado, se tirasso sus la sablo e lis endré trepeja. Sus si tijo se podon vèire uno à dos bando de péu crespu. Li fueio soun redo e en long. Li flour, verdo, soun pas bèn grosso e fan d'enflourejado agroumelado. La subsp. presentado eici, emé de flour gaire duberto e que trachis dins li mitan primàri, ié dison polycarpos. Coumpara emé la gnavello-renadivo.

Usanço :
Fai partido dóu group (38 meno) de flour dicho "de Bach". Ramenten que lou mege, Dr Edward Bach (1886-1936), adoubè de poutingo de flour que dèvon "armounisa l'equilibre epsichique de la persouno". La gnavello permetrié de prendre de decisioun. En Poulougno, au siècle passa s'acampavo li babo de vermèu (Coccus Polonicus) que reston sus li racino pèr n'en faire un coulourant rouge.